Psa 82 | HilAPD | STEP | Ang kanta nga ginsulat ni Asaf. Ginapanguluhan sang Dios ang pagtilipon sang mga dios kag ginahukman niya sila.

Psalms 82

Ang Dios Labaw sa Tanan nga Manugdumala

Ang kanta nga ginsulat ni Asaf.

1 Ginapanguluhan sang Dios ang pagtilipon sang mga dios ^{▼▼mga dios: Posible mga langitnon nga mga tinuga, ukon mga dios sang mga nasyon, ukon mga manugdumala sa kalibutan.}
kag ginahukman niya sila.
2 Siling niya, “Hasta san-o pa bala kamo maghukom sang indi matarong?
Hasta san-o pa bala ninyo paboran ang mga malain? ^{▼▼Sa Hebreo may sugpon pa nga “sela,” nga indi klaro ang buot silingon.}
3 Hatagi ninyo sang hustisya ang mga wala sing ikasarang kag mga ilo.
Depensahi ninyo ang kinamatarong sang ginadaogdaog nga mga kubos.
4 Luwasa ang mga wala sing ikasarang kag ang mga imol sa gahom sang malain nga mga tawo!

5 “Wala kamo sing inalung-ong!
Wala kamo sing naintiendihan!
Nagakabuhi kamo sa kadulom, amo gani nga wala na sing kahusayan sa kalibutan. ^{▼▼wala na…kalibutan: sa literal, nagatay-og ang tanan nga pundasyon sang kalibutan}
6 Ako, ang Labing Mataas nga Dios, nagsiling sa inyo nga mga dios kamo
kag tanan kamo mga anak ko.
7 Pero mapatay kamo pareho sa tawo.
Madula ang inyo kabuhi pareho sa bisan sin-o nga pangulo sa kalibutan.”

8 Sige na, O Dios, hukmi ang tanan nga nasyon sa kalibutan, kay imo sila.